नेपाल परिचय/घडढभूमिकानेपाल एक स्वतन्त्र, अविभाज्य, सार्वभौमसत्ता सम्पन्न, धर्मनिरपेक्ष, समावेशी, सङ्घीय लोकतान्त्रिक गणतन्त्रात्मक राज्य हो । बहुजातीय, बहुभाषिक, बहुधार्मिक तथा बहुसांस्कृतिक विशेषतायुक्त समाज नेपालको अनुपम पुँजी हो । विश्वको उच्चतम हिमशिखर सगरमाथालाई अँगाल्दै पूर्व–पश्चिम फैलिएर रहेको नेपाल विश्वमानचित्रमा गौतम बुद्धको जन्मस्थल लुम्बिनीको देश, अद्वितीय प्राकृतिक छटाको देश, सांस्कृतिक विविधताको देश एवं सगरमाथाको देशको रूपमा समेत परिचित छ । भौगोलिक, साँस्कृतिक एवं भाषिक विविधतायुक्त नेपाल आर्थिक समृद्धिका लागि कृत सङ्कल्पित छ ।
सूचना प्रविधिको अभूतपूर्व विकास, उदार विश्वव्यापार प्रणाली तथा राजनीतिक उदारवादले विश्वलाई साँघुरो बनाइदिएको छ । यसै क्रममा विश्वभरी छरिएर रहेका नेपाली एवं नेपालमा रहेका अन्य मुलुकका नागरिकहरूमाझ नेपालको भौगोलिक, ऐतिहासिक, प्रशासनिक, राजनीतिक, आर्थिक, सामाजिक, सांस्कृतिक, पत्रकारिता, भाषा, साहित्य र कला, जनसङ्ख्या एवं विकासात्मक सूचनाहरू प्रवाह गरी नेपाललाई चिनाउने पाठ्यसामग्रीको खाँचोलाई मध्यनजर गर्दै यो पुस्तक लेखन तथा प्रकाशनको जमर्को गरिएको छ । यो पुस्तक नेपाली समाजको पछिल्लो पुस्ता जो भौगोलिक रूपमा नेपाली भूमिबाट टाढा रहेका छन् उनीहरूलाई नेपालको विषयमा जानकारी गराउन सहायकसिद्ध हुनेछ । साथै, नेपाल आउने पर्यटक, लगानीकर्तालगायत नेपालसम्बन्धी अध्ययन अनुसन्धान गर्न चाहने जो सुकैका लागिसमेत यो पुस्तक उपयोगी हुने हाम्रो विश्वास छ ।
